મીડિયા બ્રીફ: ભારતમાં પ્રથમ વખત: મુંબઈ-અમદાવાદ બુલેટ ટ્રેન પ્રોજેક્ટની પર્વતીય ટનલ માટે 'ટનલ હૂડ્સ' રજૂ કરવામાં આવ્યા

મુંબઈ–અમદાવાદ બુલેટ ટ્રેન પ્રોજેક્ટમાં પર્વતીય ટનલોના પ્રવેશદ્વારો પર ટનલ હૂડ્સ સ્થાપિત કરવામાં આવી રહ્યા છે. ભારત ખાતે રેલવે ટનલ્સ માટે આ પ્રકારની ટનલ હૂડ ટેકનોલોજીનું પ્રથમ વખત ડિઝાઇનિંગ અને અમલીકરણ કરવામાં આવ્યું છે.

મુંબઈ–અમદાવાદ બુલેટ ટ્રેન કોરિડોર પડકારજનક ભૂપ્રદેશમાંથી પસાર થાય છે અને તેમાં મહારાષ્ટ્રમાં 7 પર્વતીય ટનલ્સ તથા ગુજરાતમાં 1 પર્વતીય ટનલનો સમાવેશ થાય છે. આ તમામ પર્વતીય ટનલ્સના બંને છેડાઓ પર ટનલ હૂડ્સની વ્યવસ્થા કરવામાં આવી રહી છે.

ટનલ હૂડ્સ શા માટે જરૂરી છે?

જ્યારે હાઈ-સ્પીડ ટ્રેન ટનલમાં પ્રવેશ કરે છે, ત્યારે તે પોતાની આગળ મોટી માત્રામાં હવાને ધકેલે છે, જે સિલિન્ડરની અંદર આગળ વધતા પિસ્ટન જેવી અસર સર્જે છે. હવાના આ અચાનક સંકોચનથી દબાણ તરંગો (પ્રેશર વેવ્સ) ઉત્પન્ન થાય છે, જે સમગ્ર ટનલમાં પ્રસરે છે. જો આ દબાણ તરંગોનું યોગ્ય રીતે નિયંત્રણ ન કરવામાં આવે, તો ટ્રેન ટનલમાંથી બહાર નીકળે ત્યારે જોરદાર ગર્જના જેવો અવાજ (બૂમિંગ નોઇઝ) ઉત્પન્ન થઈ શકે છે.
ટનલ હૂડ્સ ખુલ્લા વાતાવરણ અને ટનલના સીમિત અવકાશ વચ્ચે સંક્રમણ ક્ષેત્ર (ટ્રાન્ઝિશન ઝોન) તરીકે કાર્ય કરે છે. તેઓ હવાને વધુ ધીમે અને નિયંત્રિત રીતે અંદર પ્રવેશવા તથા બહાર નીકળવાની મંજૂરી આપે છે, જેના કારણે દબાણમાં થતા અચાનક ફેરફારો નિયંત્રિત થાય છે અને સમગ્ર સિસ્ટમની વાયુગતિશાસ્ત્રીય (એરોડાયનેમિક) કાર્યક્ષમતા વધુ સુધરે છે.

બુલેટ ટ્રેન કોરિડોર પર સ્થાપિત કરવામાં આવતા ટનલ હૂડ્સને નીચેના હેતુઓને ધ્યાનમાં રાખીને ડિઝાઇન કરવામાં આવ્યા છે:

• હાઈ-સ્પીડ ટ્રેન ટનલમાંથી બહાર નીકળે ત્યારે ઉત્પન્ન થતા ટનલ બૂમ અને અવાજને ઓછો કરવો.
• આસપાસના વિસ્તારો અને સ્થાનિક સમુદાયો પર થતી અસરો તથા વિક્ષેપને ઘટાડવો.
• અત્યંત ઊંચી ઝડપે દોડતી ટ્રેનોના સુરક્ષિત અને કાર્યક્ષમ સંચાલનને સમર્થન આપવું.

સરળ શબ્દોમાં કહીએ તો, ટનલ હૂડ ટ્રેન અને હવાને એકબીજા સાથે અચાનક નહીં પરંતુ ધીમે ધીમે અનુકૂલન કરવામાં મદદ કરે છે, જેના કારણે હાઈ-સ્પીડ રેલ મુસાફરી વધુ શાંત, સરળ અને આરામદાયક બને છે.

વિશેષ દબાણ-મુક્તિ ખુલ્લા ભાગો (પ્રેશર-રિલીફ ઓપનિંગ્સ)

આ ટનલ હૂડ્સની એક વિશિષ્ટ વિશેષતા એ છે કે તેમાં દબાણ-મુક્તિ માટે ખાસ રીતે ડિઝાઇન કરાયેલા વેન્ટ્સ અથવા બારીઓ (વિન્ડોઝ) આપવામાં આવ્યા છે.

આ બારીઓ અથવા ખુલ્લા ભાગો ટ્રેન ટનલમાં પ્રવેશે ત્યારે સંકુચિત થયેલી હવાના એક ભાગને ધીમે ધીમે વાતાવરણમાં બહાર નીકળવાની મંજૂરી આપે છે. પરિણામે દબાણ તરંગોની તીવ્રતા ઘટે છે, ટનલ બૂમ ઓછો થાય છે અને હવાનો પ્રવાહ વધુ સરળ અને સંતુલિત રહે છે.

ભારતમાં વૈશ્વિક હાઈ-સ્પીડ રેલ ટેકનોલોજીનું આગમન

ટનલ હૂડ્સ બુલેટ ટ્રેન ચલાવતા એવા દેશોની હાઈ-સ્પીડ રેલ પ્રણાલીઓમાં સામાન્ય રીતે ઉપયોગમાં લેવાતી સુવિધા છે, જ્યાં ટ્રેનો 300 કિમી પ્રતિ કલાકથી વધુ ઝડપે દોડે છે. મુંબઈ–અમદાવાદ બુલેટ ટ્રેન પ્રોજેક્ટમાં તેમની અમલવારી વિશ્વસ્તરીય સલામતી, આરામ અને પર્યાવરણીય કાર્યક્ષમતાના ધોરણોને સુનિશ્ચિત કરવા માટે અદ્યતન ઇજનેરી ઉકેલો અને આંતરરાષ્ટ્રીય શ્રેષ્ઠ પદ્ધતિઓના ઉપયોગને પ્રતિબિંબિત કરે છે.

પર્વતીય ટનલ્સના ટનલ હૂડ્સની વિગતો: